Web Technologies عام

مبرمج ويب .. من وين ابدأ وكيف؟

Written by Mahmoud Aladham

أولاً .. لو انت لسا جديد وحابب تفوت بمجال الويب بشكل عام من تطوير مواقع تطبيقات .. الخ. فبدك تعرف انه هالعالم مليان لغات برمجة الها علاقة بالويب ومنها asp.net, php, python فبدك تقتصر على واحدة منهم على حسب انت وين شايف حالك؟ وهذا البوست رح يطرق لكيف تبدأ في اساسيات الويب ثم رح نختار لغة برمجة وحدة نحكي عنها وهي php على حسب مجالي. ورح اركز اكثر على المصادر العربية في التعلم ولو ما بتحب العربي بتقدر تبحث او تسال عن مصادر اجنبية.

عشان تبدأ صح. بدك تفهم انه الويب منقسم لعدة اجزاء. وعنا مجالين مهمين في الويب واحد اسمه Front End Developer. والثاني Back End Developer. مين هدول؟

ال Front End Developer. لو بدنا نيجي نترجمه فهو بيعني مطور الواجهات الامامية. وعشان اوضحلك اكثر هو الشخص المسؤول عن بناء وتطوير الشكل الي ببين قدامك لما تتصفح اي موقع على النت.   مثل html,css, js

اما اخونا الثاني Back end developer. فهو شخص مسؤول عن تطوير العمليات والاوامر الي بتحدث بالموقع بدون ما انت تشوفها او تلاحظها مثلاً الاخبار الي بتنعرض الك في الموقع هو المسؤول عن انشائها وارسالها الك. ابحث شوية ع النت حتفهم اكثر عنهم.

طيب بنفع اكون فرونت اند وما اكون باك اند؟ ايوا بنفع. بس ما بينفع تكون باك اند وانت ما عندك اساسيات الفرونت اند من البداية. فانا رح احطك ع البداية في الفرونت اند وحتنفعك لو انت قررت تكون فرونت اند او باك اند. وهنا بدك تبلش في انك تتعلم الاساسيات في الويب وابدأ في html وهي لغة الاساس، لغة التركيب او الانشاء لاي موقع الكتروني موجود على النت. وممكن تتعلمها من اكثر من مصدرعندك النت مليان دورات ودروس في html. بس حذكر الك بعضها من خلال تجربتي فيهم وهي مصادر عربية. ورح تلاقي بعض القنوات او المواقع مكررة في المساقات الثانية الي حذكرها.

أولاً من أشهر المواقع في تعليم الويب هو w3scools. الموقع رائع جداً محتواه كتابي وبيعرض الك مثال على كل درس بيعمله وبتقدر تطبق كمان عنده بتقدر تزور الموقع من هنا

قناة Elzero Web School وهي قناة صاحبها مصري. محتواها في الويب رائع جداً وكثير ناس تعلمت منها واليوم شغالين بشركات وفريلانسرز من ورا متابعتهم لهاي القناة. وبتقدر في البداية تتابع كورس html من هنا 

ثانياً لما تحس حالك انجزت وبديت تفهم وتعرف html. وتعمل شغلات بسيطة فيها بلش اتعلم كيف تخلي html والشكل الي بتعمله شكل حلو يعني نقدر نحكي تعمل المكياج لل html، فهان بدك تبلش بحاجة اسمها CSS. وهي الاكواد الي بتضيف لموقعك الشكل الي بدك توصل اله من ناحية الالوان الترتيب الانيميشن .. الخ. ونفس الشيء بتقدر تتعلمها من خلال موقع w3scool. و قناة الزيرو ويب سكول.

طيب؟ خلصت htmlو css؟ وحسيت حالك فهمتهم كويس؟ تمام ننتقل الان لدور مهم جداً في الويب وهو انت كيف ممكن تخلق موقع ثابت فقط من html, css. بمعنى انت شفت تصميم او صورة  وحابب هالتصميم هذا يكون على النت. فبدك تتعلم كيف تحول اي تصميم من صورة لكود باستعمال html, css. ولازم تتقن هاي الشغلة كويس لانه لقدام لما تشتغل بمجال الويب رح تضطر تستخدم كل اشي تعلمته ورح تسهل عليك بشكل كبير اي مشكلة تواجهك باي تنسيق او تصميم لموقع. ورح اترك لك دورة كاملة في المجال بتساعدك على التعلم بشكل كويس في تحويل التصميم لكود وهي دورة موجودة على قناة الويب زيرو سكول رابط الدورة

مر الوقت وانت بتتعلم وبتطبق الي تعلمته وممكن كمان تلاقي حالك عملت موقع كامل فقط html css. وفعلاً بديت تحس حالك صرت ممتاز. حتروح بعدها يا عزيزي على تعلم شغلة ثالثة وهي  لغة JavaScript وتعتبر من اهم لغات البرمجة في الويب.لغة مشهورة جداً  ومهم تتعلمها لحتى تقدر تحكي عن حالك Front end developer! ركز انك تتعلمها وتعرف فائدها في الموقع ولايش بنستخدمها وعندك هي دورة كاملة فيها ولو محتاج الدورة على جهازك ومش قادر تحملها الدورة محملة كاملة عندي بتقدر تاخدها مني. رابط الدورة

خلينا نحكي هيك اخدت موجز بسيط من وين وكيف ممكن تبلش وتتعلم انشاء صفحات الويب وبدايتك في Front end developer. ونيجي الان نفوت في المهم وهي PHP والي قادرة تخليك تحكي عن حالك Back end developer. باختصار شديد ال php  هي لغة من لغات البرمجة بتساعدك على انك تعمل موقعك داينمك وتتحكم في محتواه من خلال لوحة تحكم عندك ع الويب بدون ما تلعب باي كود بالموقع. واللغة مطلوبة جداً وعليها شغل كثير. وعندك كمان مشاريع مطورة باستخدام php  لتسهل عليك عمل موقع كامل باقل وقت واقل جهد. لهيك مهم جداً تتعلمها لو انت بدك تكون مطور ويب وبتشتغل php. رابط الدورة

خذلك شوية معلومات انت وين وايش ممكن تتعلم لو تعلمت php.

ال php  يا عزيزي مثل ما ذكرتلك لانها مشهورة جداً وكثير مواقع شغالة عليها. بدأو مطورين الويب يعملوا مشاريع ومكتبات وفريم وركس تساعد اي مبرمج ويب في شغله. فمثلاً بدل ما تكتب كود ياخد معك ساعة عشان تعمل وظيفة معينة بموقع. ممكن لو استخدمت فريم ورك معين تعمل هاي الوظيفة في وقت قليل جداً مقابل الوقت لو شغلت الكود من البداية. وعشان هيك سوق العمل اليوم متوجه بكثرة ناحية هاي الامور ومنها عندك نظام ادارة محتوى كامل اسمه WordPress. بيساعدك على انك تعمل موقع معين في وقت قليل جداً لتوفر القوالب والمشاريع الجاهزة المبنية على الوردبريس.

عندك كمان من frameworks  .. شغلات مثل ال codeigniter و Laravel .. الخ. بتقدر تتعلمهم لما تتعلم php وتتقنها. ورح تسهل على حالك كثير مستقبلاً في شغلك. واليوم التوجه اكثر بكثير على Laravel. ومن اهم المصادر الي ممكن تتعلم فيها اللارفيل https://laracasts.com/ بس قبل ما تتعلم ابحث شوية ع النت عنه وايش فائدته وهيك. لو رح نتكلم عنه حياخد وقت كثير وبكفي حكينا كثير في البوست.

كمان لو مستقبلاً بدك تبني موقع تجارة الكترونية باستعمال php، عندك كثير منصات بتساعدك على انشاء وتطوير موقع ومنها open cart و Magneto. والحديث يطول عليهم بس لو حبيت تتخصص في بناء التجارة الالكترونية ابدا في الماجنتو مع الملاحظة انه قليل ناس بشتغلوه والطلب عليه كثير وهذه ميزة بتنضاف الك لو تعلمته.

البوست هذا قابل للتحديث بشكل مستمر من اضافات وقنوات تعليميه ممكن الاقيها مناسبة او حد يقترحها علي اعرضها هنا.

مهم جداً انك تسأل وتستفسر عن اي اشي بدك اياه اما من Google. او تسال اي حدا اله بالمجال والشغل. تخجلش ولو عندك اي مساعدة او اي سؤال انا مستعد اجاوب عليه.

About the author

Mahmoud Aladham

1 Comment

Leave a Comment

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.